A EUGENIU UNALE

 

 

1.

EUGENIU caru,

non ti cretas

chi de te mi nde sia ismentigadu,

poeta coment'e  tottu sos poetas,

 

2.

Su silenziu to' happ'imitadu.

Pustis tant'isettare, finalmente,

un'amigu de te m'hat faeddadu.

 

3.

Mi nd'hat trattad'e m'hat fattu presente

ch'in Simala ses galu fort'e sanu

e ti la cantas ancor'allegramente.

 

4.

Deo, ca t'happ'in coro fittianu,

mi nde cuntent'e sa novella cara,

e ti mand'una fort'istrint'e manu.

 

5.

Deo so in sa patria Tonara

respirende sas aèras natias,

curende sa person'a s'abba giara.

 

6.

Cudda zetra ch'in manos mi bidias

est iscordad'e non sonat piùsu,

ca l'happo postu cordas de tinnias.

 

7.

Tue galu però nde faghes usu:

ti favorit sa zetr'in s'armonia,

ca ses fiz'a su veru Cab'e Susu.

 

8.

Ses naschid'in sa terra 'e Billia,

si cantas podes cantar'a primore ;

caru ses a Melpomen'e Talia.

 

9.

Tueses astru ch'in Putumajore

bi lassas fama coment'in Posada

bi nd'hat lassadu Mercioro Dore.

 

10.

Sa poesia mi' abbandonada

senza mai nde fagher piùs cura,

una pros'indezent'est diventada.

 

11.

S'iscrio calchi vers'a fur'a fura

tando mi nàt una oghe segreta

ch'est una porcheri'addirittura.

 

12.

Sas noe sorres mi narant: «Poeta,

mi' chi sa poesi'est indigesta,

pensa de osservare sa dieta».

 

13.

Cust'ironica oghe de protesta,

amigu meu, non podes pensare

cant'a s'orija mi sonat molesta.

 

14.

Pro cuss'est chi no m'isco rassignare

a su dijunu de s'arte poetica;

sa fert'est grav'e non podet curare.

 

15.

S'anima mia, de natur'iscettica,

bramosa de intrare in su Parnasu,

credula si dimustrat e ascetica.

 

16.

Però in Elicona pagu casu

faghent de me, mi faghene sas ficcas

sas noe Sorres si ped'unu basu.

 

17.

De Ippocrene sas abbas sunt siccas ;

cand'happo protestadu : « So sididu»,

m'hana rispostu: «Bandas e t'impiccas».

 

18.

S'azzettadu l'haere su cumbidu

a' custas oras tranquillu fia,

e forsis no mi nde fia penettidu.

 

19.

Bae in bonora, bae, poesia!

S'est presentada che tentazione,

a brullare sa mia fantasia.

 

20.

Bae chi happ'a dar'attenzione,

si a casu mi tentas dae nou

no happ'a essere gai tontorrone.

 

21.

Sa testa mi' est fragile che ou,

però si benis tue, musa vana,

pro sort'est chi bi craves unu zou.

 

22.

Pro cantu ses gasie risulana

a mie non mi ponzas a sa prova;

de brullare nde tenzo paga gana.

 

23.

Non zocches a sa mia mente bova

a mi pedir'unu semplice muttu,

mi'ca ti le' a colpos de iscova.

 

24.

Su laru tenedilu, ca est fructu

de sos veros poetes, sa corona

a mie faghemila de armuttu.

 

25.

Tue, Unale caru, in Elicona

jura fid'a sa Pieria dea,

ca de tottu sas musas est padrona.

 

26.

Si ti capitat poneli trobea,

profitta como chi t'istimat tantu,

si no est fazil'a mudar'idea.

 

27.

Tue abberi sas laras a su cantu

armoniosu, e sias de consolu

a sos coros chi vivent de piantu.

 

28.

Deo t'invoco cale russignolu     

ben'a cantar'a sa patria mia,

ispalghelas sas alas a su olu.

 

29.

Milli cosas contare ti cheria,

e cheria godire ness'un'ora

su consul'e sa tua cumpagnia.

 

30.

Ismentigadu non t'haia ancora,

ti nde fatto solenne giuramentu,

sa limba mia non est impostora.

 

31.

Galu ses in su meu pensamentu:

chi de te non m'ammente, caru amigu,

no che passat nè ora nè momentu.

 

32.

Deo ancora so s'amig'antigu,

si ti paret chi facci'happo mudadu

severamente ponem'in castigu.

 

33.

Si a t'iscrier goi Nappo tardadu,

no nelzas inurban'e negligente,

ca mai negligente so istadu.

 

34.

De su restu, faeddo francamente,

si eo istadu so silenziosu,

tu'has fattu su surd'ugualmente.

 

35.

Menzus ch'istadu sias disizosu

in isettare bonas novas mias,

che mi narrer seccant'e infadosu.

 

36.

Prit'a las narrer, custas litanias

chi t'imbio, ti devent resessire

seccantes verament'e istantias.

 

37.

Mentres ti prego de mi cumpadire

si troppu noiosu so istadu,

varias cosas ti do a ischire.

 

38.

In primu iscas chi happ'incontradu

cuddu superiore tirriosu

chi tenimis fattende su soldadu.

 

39.

Accanta m'est passadu, bilgonzosu,

ma non 1'happo negadu su saludu,

prite ca so de coro piedosu.

 

40.

No m'hat rispust'e restadu s'est mudu,

prite fit istrazzadu in modu tale

chi si timiat de li narrer nudu.

 

41.

Puru si ti nd'ammentas cantu male

hat fattu cussu, a mi'e a tie,

 cando l'haimis sutt'uffiziale.

 

42.

A lu diat a crér chi o' in die

diat a benner in bisonz'e pane?

Su mundu, caru meu, est fatt'asie.

 

43.

Deo, invece de li narrer : « Cane! »,

happo tentadu de l'avvicinare,

ipse però de me s'est fatt'addane.

 

44.

Ma inter ipse hat devid'esclamare:

«Si unu tempus bonu istadu fia,

 corno teni'a chie m'ajudare».

 

45.

Cuddos chi de sa sua tirannia

salvos sunt, si lu ident in s'istrada,

lu giamant cun su lumen de ispia.

 

46.

S'ipocrita canagli'est mal'andada;

a unu 1'hat punidu su pugnale,

s'ater'est mortu cun s'anca truncada.

 

47.

Bona parte bi nd'hat in s'ispidale,

ca giughent frazigadu su pulmone,

isettende s'insoro funerale.

 

48.

Cuddu marranu frade de Nerone

istad'est cundennadu pro rapina

a bindig'annos de reclusione.

 

49.

Bi nd'hat in cumpagni'e disciplina:

samben'hat fattu s'istrale fonnesa,

basada siat sa man'assassina.

 

50.

Non t'indignet sa mia cuntentesa

chi dimustr'in basare cudda manu

chi sever'hat punidu sa vilesa.

 

51.

Peus pro chie de coro villanu

da ch'est soldadu ponet in alvidu

chi su soldadu dét essere umanu.

 

52.

Tue pur'a soldadu ses bestidu,

a dogn'istante dés haer presente

su chi suffrinde ses e has suffridu.

 

53.

Tratta bene su tou dipendente

cando nde tenes, ca ti narant bonu:

menzus semper chi siast indulgente.

 

54.

Cumanda, ma no cumandes che padronu,

ma che babb'amorosu; su rigore,

semper chi podes, pon'in abbandonu.

 

55.

Cun sos bonos faeddos, cun s'amore

s'ottenet tottu, duncas amorosu

vive cun tottus e faghed'onore.

 

56.

Prosigh'a ti mustrare virtuosu:

senza virtude s'omine s'agattat

che barchitt'in su mare burrascosu.

 

57.

Però s'omine chi onestu trattat

pro finas cun sos malos tenet paghe,

prite sas differenzias appattat.

 

58.

De su restu ses mannu, tue faghe

su dovere: ti chelzo in s'onestade

 ischire un'incrollabile nuraghe.

 

59.

Ti naro tottu cust', o caru frade,

prite t'istimo e senz'ipocrisia

amigu so de sa sinceridade.

 

60.

Deo prego sa tua cortesia

a perdonare cust'iscrittu meu

bestid'a pannos de malinconia.

 

61.

Si ti preguntant de Peppe Mereu,

nara chi est trazende isconsoladu

sa rughe de su dol'e de s'anneu.

 

62.

Si calch'amigu giustu b'hat restadu,

soldadu de sa propria bandera,

siat a lumen meu saludadu.

 

63.

Tue, si podes, faghe sa manera,

procura de m'iscrier prontamente

brullant'e consalant'una littèra.

 

64.

Deo t'happ'a iscrier frequente

fin'a mi narrer maccu e infadosu,

ciarlatanu, seccant'e imprudente.

 

65.

Luegh'iscrie. Pro com'adiosu,

dae cust'amenu' e floridu giardinu

ti mandat unu basu affettuosu

s'amigu tou

                      Mereu Peppinu.

 

                                                                                      

per contattarci: corofem@hotmail.com