A NANNI SULIS

 

1.

Guai si avanzes. Para,

falche ingrata. Non creo

chi nde chelzas messare unu fiore.

Porca assassina, nara:

forzis non bi so deo

lottende in d'unu mare de dolore?

Abbrevia sa mia

terribile agonia

ma salva custu gravellu de amore;

salva custu gentile

 lizu, si non ses ingrata e vile.

 

2.

Tue, o Crocifissu,

si la podes suspender,

 para de Nanni sas afflissiones.

Ca si bocchis a issu

guai!, has'a intender

dae me funestas malediziones.

In sa celeste isfera

sa mia preghiera

accetta: custu lizu non abbandones,

provvedi prontamente,

o salvalu o non ses onnipotente.

 

3.

E tue, dulche Maria,

isposa e mamma 'e Deu,

piedade ti prego, piedade:

tue ses bona e pia,

salva s'amigu meu,

salva s'amigu meu, unicu frade.

Prite non ti presentas

a Deus e ti lamentas

a issu pro sa triste infermidade

chi est bocchinde a chie

bisonzat sanu a seppellire a mie?

 

                                                                                      

per contattarci: corofem@hotmail.com