A NANNI SULIS

 

1.

Eccomi de nou a t'infadare

cun sas solitas mias novas malas,

prite ca bonas non nde poto dare.

 

2.

Maj'est fioridu e post'in galas,

a tottus dt cuntentu: su dolore

subra me hat ispaltu tristas alas.

 

3.

It'importat chi sogne unu fiore,

una viol'amabil'e gentile,

cando ch'in sinu meu est mort'amore?

 

4.

Tempestosu connottu happo s'abrile

de custa vida chi passende so

connoschinde sa notte a manzanile.

 

5.

Semper chi s'isperanz' “Aj”

m'hat nadu, happo pedidu unu sorrisu,

ma s'isventura m'hat rispostu : No.

 

6.

Dae sa vida m'agatto divisu,

sa persone .pro s'ultimu viaggiu

serenamente isettat s'avvisu.

 

7.

Como mi toccat a donare saggiu

de firmesa, sa mia sepoltura

est iscavad'e m'infundet coraggiu.

 

8.

O forzis chi su fiz'e s'isventura

a vista de sa falche messadora

si dt bestir'a pannos de paura?

 

9.

Est beru, s, so gal'a s'aurora

de sos annos; ma si est decretadu,

e devo morrer, non timo cuss'ora.

 

10.

Ite fatt'in su mundu disamadu,

afflittu dae milli graves penas?

Menzus in d'una fossa sutterradu.

 

11.

Su sambene siccad'happ'in sas venas,

istanca e isfinida sa persone

andat a traz'e si rezzet appenas.

 

12.

Giovanu so e mi giamant bezzone,

e cun rejone mi narant moninca,

cando giutt'a passizu su bastone.

 

13.

Como non pot'andare brinca brinca

comente unu tempus brincaia,

ca m'hant fattu coron'e proinca.

 

14.

Sos menzus annos de sa pizzinnia

mi los passo tocchende sa campana

c'annunziat sa trista fine mia.

 

15.

Cale, cale dt esser cudda giana

chi a su cursu de sos annos meos

zintu hat sa funesta cadiana?

 

16.

Cando happ'invocadu sos recreos

d'unu ris'amorosu, unu carignu,

happ'happidu dolores e anneos.

 

17.

Possibile chi non sia istadu dignu

mai de incontrare affettuosu

e sorrident'unu chizu benignu?

 

18.

Ca so in cust'istadu dolorosu,

dae me si sunt fattos a un'ala:

non si nd'agattat coro piedosu.

 

19.

Sos amigos, in custa sorte mala,

hant fattu finta de fagher su teu,

e m'hant lassadu cun sa rugh' a pala.

 

20.

Deo per, pro su carattere meu,

mai mi so frittidu a zente gai

pedinde unu Simone Cireneu.

 

21.

Pat'in segretu e non m'abbascio mai:

umiliarem'a coros marranos?

Prim' 'e connoscher cuss'ora, guai.

 

22.

Forzis s'haere lintu zertas manos,

como fia nadende in sa ricchesa,

a dannu de sos nostros paisanos.

 

23.

Ma prim'e cummittire una vilesa

a dannu de sos meos patriottos,

mi onor'e sa mia poveresa.

 

24.

Mi faghent fele zertos signorottos,

concas de linna e ispiantados,

chi si vantant pro riccos e pro dottos.

 

25.

Si los bider comente sunt mudados:

passizzant pro mustrare sa bacchetta

e abidos chi non sunt galu pagados.

 

26.

In bifida faghent sa marionetta.

Ispudorados! cun sas malas tramas

sunt vermes chi bulluzzant s'abba netta.

 

27.

Su disisperu sunt de tantas mamas

chi cherent in sas fizas coltivare

violas de virtud'e bonas famas.

 

28.

Isfamare, trampar'e violare,

est dovere pro custos trampaneris.

onestamente no ischint campare.

 

29.

Deo no isco, sos carabineris

in logu nostru prit'est chi bi sune,

e no arrestant sos bangarrutteris.

 

30.

Bi cheret una furca e una fune

e impiccar'impiccare continu

finas a si purgare sa Comune.

 

31.

Torret sa legge de Villamarinu:

pro chi su male non fettat cangrena

bi cheret a duttore su boccinu.

 

32.

Viles c'hant meritadu sa cadena,

sa giustissia puru hana trampadu,

gai s'hant infrancadu dogni pena.

 

33.

Mentres chi unu poveru appretadu

furat pro s'appittitu unu cogone,

lu ides arrestadu e cundennadu.

 

34.

Su famidu chi furat un'anzone

est cundennadu dae sos giurados

fin'a degh'annos de reclusione.

 

35.

E narrer chi b'hat palattos fraigados

dae sa man'infam'e sa rapina:

sos meres ladros sunt pis amados!

 

36.

Sa ros'in custos tempos est ispina,

o'in die s'ispina si nt rosa:

si pagat su piuer pro farina.

 

37.

Sa limba de s'infamia velenosa

si una rosa b'hat gentil'e bella,

ti la dipinghet fea e ispinosa.

 

38.

Miseru chie corcad'in carrella

e in nottes serenas de lugore

pro ipse in chelu non lughet istella.

 

39.

Miserinu su ch'andat pedidore

a pedir'unu bicculu'e pane

a su giannile de calchi segnore.

 

40.

Su riccu dt biscottos a su cane,

e a su poveru narat: preizosu,

trivaglia, e dae me istad'addane.

 

41.

Su chi no est istadu bisonzosu

incapaz'est de bonas aziones,

non podet esser mai piedosu.

 

42.

Tottu sos poverittos sunt mandrones

pro sos attattos, ca no hant connottu

famen', affannos e afflissiones.

 

43.

Ma si s'avverat cuddu terremotu,

su chi Giagu Siottu est preighende,

puru sa poveres'hat haer votu.

 

44.

Happ'a bider dolentes esclamende

Mea culpa sos viles prinzipales,

palatos e terrinos dividende.

 

45.

Senza distinziones curiales

devimus esser, fizos de un'insigna,

liberos, rispettados, uguales.

 

46.

Unu die sa povera Sardigna

si naiat de Roma su granariu:

como de tale fama no nde'est digna.

 

47.

Su jardinu, su campu, s'olivariu

d'unu tempus antigu, s'est mudadu

ind'unu trist'ispinosu calvariu.

 

48.

Buscos chi mai b'haiat intradu

rajos de sole, miseras sacchettas

hant bestid'e su log'hant ispozzadu.

 

49.

Arvures chi pariant pinnettas,

pro ingrassare su continentale,

affrontadu hant undas e marettas.

 

50.

Inue tott'est passada s'istrale

pro seculos e seculos, de zertu

si dt bider funestu su signale.

 

51.

Vile su chi sas giannas hat apertu

 a s'istranzu pro benner cun sa serra

fagher de custu logu unu desertu.

 

52.

Sos vandalos, cun briga e cuntierra,

benint dae lontanu a si partire

sos fruttos, da chi si brujant sa terra.

 

53.

Isperamus chi prestu hat a finire

cust'istadu de cosas dolorosu.

meda semus istancos de suffrire.

 

54.

Guai si no essre isperanzosu

in fiores donosos e galanos,

de cuddos ch'hant profumu virtuosu.

 

55.

Mancar'in testa giutta pilos canos

sa mente sognat e su coro bramat

pro custa terra rosas e beranos.

 

56.

Su coro meu galu s'infiamat,

su chizu, privu d'unu chizu ermosu,

amarissimas lagrimas derramat.

 

57.

Tue, chi ses gentile e amorosu,

cumpatimi s'iscrio dae nou,

non mi nelzas seccant'e infadosu.

 

58.

Si ti suvvenis de s'amigu tou,

cumandalu ch'est prontu a ti servire:

tottu est chi lu ponzas a su prou.

 

59.

Deo, gi 1'ischis, so pro mi partire.

Abbrevia pro cussu e prontamente

de coment'istas donam'a ischire.

 

60.

Si no mi podet benner de repente

su colpu tristu ch'isettende so:

tand'iscrittu m'has haer vanamente.

 

61.

Ancora ses a tempus, aj,

a custa oghe non ti mustres mudu;

tue de coro duru non ses, no,

 

62.

anzis istadu semper ses s'azzudu,

su cunfortu, s'ispera'e su mischinu.

Duncas azzetta su meu saludu,

 

ca ti lu mandat s'amigu

                                      Peppinu

                                                                                      

per contattarci: corofem@hotmail.com