ALBERTO LA MARMORA

 

1.        

2.      Tottus unidos, minores e mannos,

avanzad 'a innoghe a passu lentu:

sa Punta Paulina in Gennargentu

cumprit su votu de settantott'annos.

Non bos fettan paura sos malannos

chi podent causare nie e bentu.

Sa prima preda de su fundamentu

est bettada e lassade sos affannos.

 

2.

Festa che custa non b'hat piùs bella,

su momentu est solenne, s'ora est grave :

La Marmora est torradu a Bruncu Spina.

In santu Bastianu de Biella

una oghe dulzissima e soave

giamat da una losa : Paolina.

 

3.

Paolina, cun boghe armoniosa

a fronte alta sullevat custu gridu

« O Alberto La Marmora, riposa,

su votu chi has fattu ecco cumpridu;

dormi in paghe sos sognos de sa losa

ch'affini connottu happo su nidu

de su cale nde fia bisonzosa

dae cando a innoghe ses benidu.

 

4.

Zente povera, sì, però sincera

hat versadu istillas de sudore

pro unu nidu a sa tua memoria,

e a pes meos sa Sardigna intera

oe est benida a mi fagher'onore,

avvenimentu dignu de sa gloria.

 

5.

Ite festa, ite paghe, ite armonia!

Orgogliosa so, no nde fi' digna

de saludare s'intera Sardigna

in sa modesta domighedda mia.

Barbagia non dés narrer piùs titia,

beni puru a pedire carapigna;

s'has frittu agattas calura benigna,

gai m'hat fattu Alberto, bona e pia.

 

6.

Grazie a chie mi faghet tanta festa:

nd'approffitto 'e sa bella circustanzia

saludo augurende amor'e paghe;

da una domo umile e modesta,

cando bi had'amore e fratellanzia,

s'alzad'un'incrollabile nuraghe.

 

7. Gai firmu in te su sentimentu

siat de s'onestade e de s'amore,

o Sardigna, su pane cun sudore

pappa e non ruas in avvilimentu.

Non timas mai s'astragadu bentu

nè a sas iras cunserves rancore.

Oe so tottu risu e tottu amore,

oe su coro palpitat cuntentu.

 

8.

Ti saludo e ti prego, eletta gente,

d'Eolo non timas piùs su muilu

né de s'astragadu happas timòria :

fritti innoghe su chizu e riverente

in custa pedra suspiradu asilu

saluda de Alberto sa memoria».

 

                                                     

per contattarci: corofem@hotmail.com