CONSIZU A UNU AMIGU

 

1.

Pro cantu m'has pregadu

a ti dar'unu parre,

già c'has idea 'e leare muzere,

frade meu istimadu,

su chi ti poto narre

est chi fettas su tou piaghere.

Unu parre ti do,

l'azzettes, si o no,

de ti lu dare mi sent'in dovere.

Com'est chi ti do prou

chi m'est a coro s'interessu tou.

 

2.

Ti giuro francamente

chi m'agatto surpresu

prite mai credi'a tal'insoniu.

Non cumprendo comente

né chie t'hat azzesu

s'idea macca de su matrimoniu.

In custu fattu tou

original'e nou,

zeltu b'hat postu coa su dimoniu.

Pro cussu so dispostu

de ti risponder cun su musu tostu.

 

3.

Cumprid'has barant'annos,

e ti ses iscampadu

de leare muzere fin'a como.

De repent'in affannos,

cheres mudar'istadu,

cun ti ponner tiaulos in domo

so in su disisperu

chi bi ruas a beru,

de s'oriolu c'happo no nde dromo.

Ma s'iscultas a mie

no has a esser fragile gasie.

 

4.

Ello no est macchine

amare a sa bezzesa

su c'has fuid'in sa giovane edade?

Faghela de omine,

abbandona s'impresa

si cheres viver cun felizidade;

si calchi femminedda

ti mustrat sa bunnedda,

nara c'has fattu vot' 'e castidade.

No ames in su seriu,

si no ti naro chi no has criteriu.

 

5.

In s'umanu consorziu

pag'astutu ti creo,

si ti faghes teraccu sende mere.

Si bi fit su divorziu

forsis su primu deo

ti dia narrer : « sì, lea muzere»,

prite tando assumancu,

da chi nde ses istancu

la podes riformar'a piaghere.

Ma como no affides:

cussa legg'est dorminde, già lu ides.

 

 

6.

Ahi cherveddu iscassu!

Su male ti disizas,

it'est custa mudada repentina?

Si su fatale passu

faghes, già ti nd'abbizzas

ite cos'est in dom'una femmina.

De natur'ingannosa,

si mustrat una rosa,

cando la toccas ti punghet s'ispina.

Adamu, nat s'istoria,

pro culpa d'Eva hat perdidu sa gloria.

 

 

7.

Ponimus in su casu

chi sies cojuadu.

Senza chi tant'esempios ti zite,

ti fatto persuasu chi ti ses ingannadu,

e ti fatto connoscher su proite.

Amore no nde gosas,

dae su die ch'isposas

intras cun sos dimonios in lite:

sa femina est pesu,

chi 1'ischit solu chic b'est in mesu.

 

 

8.

Dae su di' 'e s'affidu

deves fagher su seriu

prit'abbrazzas sa rugh' 'e su dolore.

Ti giamana maridu,

faeddu de misteriu

ch'a bortas cheret narrer cobertore.

Cun s'amada cumpagna

ti dàs a sa campagna,

olvidende su mundu pro s'amore

e a front'alta che chervu

de sa cumpagna tu'andas supervu.

 

 

9.

S'est una signorina,

cun onore decoro,

la dés tenner in abidos de rasu;

semper in cappellina,

manifide de oro

e sa riforma de su pane e casu,

prite s'est vissiosa,

de su ch'est disizzosa,

si no 1'ottenet, ti negat su basu.

Tando, pro dannu tou,

intrat in ballu su caffè cun ou.

 

 

10.

A una signorina

chi si tenet in gradu

l'est in domo dezente sa fiacca.

Pro fagher sa coghina

tue sese obbligadu

a crebagor'accordare teracca,

e una cameriera,

senza sa caffettera,

ch'est sa chi t'allezerit sa busacca.

A lettu sa padrona

bona mer'est de fagher sa mandrona.

 

 

11.

Mentres tu'in s'offissiu

dae bonu manzanu

sudas cuddas mischinas zorronadas,

ipsa, senza giudissiu,

cun su romanz'in manu,

faghet sa vida de pappa 'e badas.

Giornales e rivistas,

sartinas e modistas,

zeltamente ti dant pagas intradas;

anzis, modas e nastros,

favorint de sa bussa sos disastros.

 

 

12.

A ipsa ogni cuntentu

tue dés accanzare

si no ti perdet su geni' e' s'affettu,

e si no istas attentu

si podet avverare

su fattu de su padre sutta lettu:

giughent s'argentu vivu,

e si non ses attivu

ti furcana sa testa pro dispettu.

Si est muzere bella

faghes ben'a li ponner sentinella.

 

 

13.

Ses bezz'e impotente,

de manizzar'isprone

creo c'happes perdidu sa virtude.

No est mancu dezente

a unu carrattone

de 1'accallar'una puddedra rude,

ca truncat sa trobea,

e si si pesat rea

zelt'est chi ti ruinat sa salude.

Debile ses de fisicu,

e si muzere leas moris tisicu.

 

 

14.

Tottu custos fastizos

suni niente a pettu

de sas ateras penas e burrascas.

Cando benit in fizos,

ipsa corcad'a lettu,

e tu'istas abbizz'a fagher fascas:

pianghet su messia,

e tue, in s'anninnia,

li cantas su sinceru malas pascas.

Sa pedd' 'e sa elveghe

no bastat a s'isfundadu colafeghe.

 

 

15.

Tottu consideradu,

est gravosa e pesante

sa rughe chi ti cheres abbrazzare.

Si ses a mal'istadu

lead'unu purgante:

su calore già benit a zessare.

Teniast su disizu

de ti dare consizu,

dadu ti 1'happo : a ti'est a pensare.

Ammenta c'avvisadu

s'omine, nàt su dicciu, est già salvadu.

 

                                                                                      

per contattarci: corofem@hotmail.com