DAE UNA LOSA ISMENTIGADA

 

1.

Non sias ingrata, no, para sos passos,

o giovana ch'in vid'happ'istimadu.

Lassa sas allegrias e ispassos

e pensa chi so inoghe sepultadu.

Vermes ischivos si sunt fattos rassos

de cuddos ojos chi tantu has miradu.

Para, par'un'istante, e tene cura

de cust'ismentigada sepoltura.

2.

A ti nd'ammentas, cando chi vivia

passaimis ridend'oras interas?

Como happ'una triste cumpagnia

de ossos e de testas cadaveras,

fin'a mortu mi faghet pauria

su tremendu silenz'e sas osseras.

E tue non ti dignas un'istante

de pensare ch'inogh'has un amante!

3.

Ben'a custas osseras, cun anneos,

si no est falsu su chi mi giuraist,

e pensa chi bi sunt sos ossos meos,

sos ossos de su corpus ch'istimaist;

fattos in pruer, non pis intreos

comente cand'a biu 1'abbrazzaist.

Non pis agattas sas formas antigas,

ca so pastu de vermes e formigas.

4.

Bae, ma cando ses dormind'a lettu

una oghe ti dt benner in su bentu,

su coro t'hat a tremer in su pettu

a' cussa trista boghe de lamentu

chi t'hat a narrer: custu fit s'affettu,

custu fit su solenne giuramentu?

Inoghe non ti firmas, lestra passas

e a' custa trista rughe non t'abbassas.

5.

Cando passas inoghe pass'umle;

t'imponzat custa pedra su rispettu,

ca so mortu pro te anima vile,

privu de isperanz'e de affettu.

Dae custa fritta losa unu gentile

fiore sega e ponedil'in pettu,

pro ch'ammentes comente t'happ'amadu,

gi chi tue ti 1'has ismentigadu.

 

                                                                                      

per contattarci: corofem@hotmail.com