DIALUGU FRA MARIDU E MUZERE

 

Muzere

Ue dias a esser fin'a como?

Possibile chi non t'iscas emendare?

Bessidu chi che sias dae domo

non pensas e nè sentis de torrare.

Si non mudas penser'eo ti domo;

mira chi non ti torret a costare

de torrar'imbreag'a custas oras;

s'atter'orta lu faghes, corcas foras.

 

Maridu

Importat pag'a ti dar'a ischire

inue tottu cantu so istadu.

De bessire mi cheres proibire;

miserinu, a cosa so torradu!

Però si foras mi faghes dormire

de comente m'has como minettadu,

cando zocco sa janna e non abberis,

tando ti nd'atto sos carabineris.

 

Muzere

Non los fentomes sos carabineris,

ca sunt pro ti che ponner in presone,

prite ses oziosu in sos zilleris,

maccu, mal'a sentir'e imbreagone.

Dend'a pappar'a sos bangarrutteris,

de sos iscamminados ses dugone.

In domo b'est sa famen'a benuju,

e tue pro su ticcu das su tuju!

 

Maridu

Mal'happes tue cun s'imbreaghera,

de t'intender gosie so'istancu.

La' chi frastimes a sa caffettera

cussu già mi 1'arrangiat su fiancu;

ses in domo che femmina partera,

dogni die nde cheres unu francu.

Tottu ti lu dissipas in decottos,

zicculatte, rosoli'e biscottos.

 

Muzere

It'est su chi ses nende, faularzu?

Da eri notte cand'hamus chenadu

m'has lassad'in sa cass'unu chivarzu;

non crettas chi mi 1'happe mandigadu,

1'happo chistid'a ti prenner s'iscarzu

pro te happo suffrid'e jaunadu.

Lassadu non m'has pranzu no m'has chena,

nè corcada mi so a brente piena.

 

Maridu

Cantu diliga ses e amorosa!

Su chivarzu a mie has cunservadu,

signal'est ch'has pappadu menzus cosa:

puzzone chi non biccat hat biccadu.

S'istada fist de zibu bisonzosa

su chivarzu 1'haiast mandigadu.

Cunservad'has a mie su cogone,

ca t'has pappadu su menzus buccone.

 

Muzere

Cale dét essere su menzus buccone

ch'eo happo pa~ppad'a fur'a tie?

Forzis dét esser sa pett' 'e anzone,

sa chi mi ses pighende d'ogni die?

A mandigare .pan'e chilinzone

abituada non fia gosie.

De sa gana non isto manch'in pè,

rejion'est chi mi fetta su caffè.

 

Maridu

Paret chi non fist mancu abituada

a mandigare seppia e triglia;

pappaiast cogon'e aringada,

ca fist de miserabile famiglia :

in domo mia ti ses ingrassada

e da cussu non sentis piùs briglia.

Pro t'ingrassare mi so ruinadu:

mal'happe deo chi t'happo leadu.

 

Muzere

Bae chi deo non fia gasie,

famene nè bilgonz'happo proadu:

como, sì, so torrada che a tie

cando m'has a isposa dimandadu,

ca si no hiast incappad'a mie

fiast ancor'a calzon'isfundadu.

Cando t'happo leadu pro maridu

in dada chent'iscudos t'happ'attidu.

 

Maridu

De cussos chent'iscudos nd'happ'ispesu

trinta pro su caffè a macchinetta,

a mie mi nd'has dadu trinta e mesu,

già ti los Nappo leados in petta,

trinta iscudos e unu cagliaresu

los has ispesos pro una fardetta,

e de sos sette francos e chimbanta

ti nd'has leadu de lana una manta.

 

Muzere

Troppu prest'has perdidu sos arrancos

de tantas mia bonas aziones!

Ammentadinde de sessanta francos

chi happ'ispes'a ti fagher carzones,

cando giughiast nudos sos fiancos

espost'a beffas e zitassiones

non 1'happ ispes'in su caffè cun ou,

ma solu pro ti ponner fundu nou.

 

Maridu

Tando pro m'affundare su carzone

deves giugher sas manos cancaradas?

Cussu ti toccat de obbligassione,

ca non ti tenzo pro pappar'e badas

si mi hant fatt'una zitassione

tue macaca mi 1_as has chircadas

leende caffè a fide in sas buttegas ;

ti lu dant, ti lu buffas e ti negas.

 

Muzere

Bae chi deo so ancor'in sé,

de sentidu non so galu guasta:

nemmancu pro tres unzas de caffè:

sos benes meos dés bider a s'asta :

tue sì, maccu, non istas in pè,

ca t'hat cumbintu su in'e s'Ozasta.

Buffas che unu turcu e t'imbreagas,

deves a tottus e a nemos pagas.

 

Maridu

Naras chi mai istada ses zitada,

cuss'a su narrer tou est una proa!

Sos benes has lassad'a chie nd'hada,

no siet chi ti pighent a sa coa!

Ses una caffetter'ismanigada

ma ti dént ponner sa maniga noa.

Suni nalzende chi sa zente truffas

prite non pagas su caffè chi buffas.

 

Muzere

Bae chi pro tres unzas de caffè

non m'has a bier, no, in tribunale:

tue bi podes istare piùs de me,

ca t'imbreagas, su porcu mannale;

como ch'est como non firmas in pè,

attentu pro su codice penale.

Su tribunale non chirches a mie,

Pertunghefustes, ca deghet a tie.

 

Maridu

Siet finida custa chistione,

cagliadi muda e lassami dormire;

non cherzo brigas nè confusione,

est tempus custa beffa a la finire.

Dogni notte mi faghes su sermone:

balla, c'a beru ses mala sentire.

Abboghinende credes chi ses bella,

e ses su ris'e totta sa carrella.

 

Muzere

Tue ses su beffadu'e su mundu,

sos bonos già ti leant su fiagu.

Giughes sos pantalones senza fundu

e ses in sos zilleris imbreagu!

Da ch'in domo no istas, vagabundu,

feti non pig'a m'infilare s'agu

a su ness'a ti ponner unu puntu

iscamminadu, cherveddu pertuntu!

 

Maridu

S'has faccia manna, de agos faedda.

E a ite mi naras vagabundu?

Si non fist vissios'e mandronedda,

fia su lizu de tottu su mundu.

Balla, si coghes cos'in sa padedda

pappas pro finas a bider su fundu!

Tue divoras in domo, sola, e pappas,

ma sas birgonzas mias non las tappas.

 

Muzere

Si cheres assentada sa persone,

senza frenu no andes a iscappu

non si vivet faghinde su mandrone,

lassa su inu e leadi su zappu.

Tand'has haer giacchett'e pantalone:

ma si non mudas vida non has tappu.

Anzi, si sighis gai, prestu prestu

nd'has a perdere su fund'e' su restu.

 

Maridu

Gai cheres chi bande a zappittare,

e a lassare su binu pro su piccu?

E tue istas in dom'a iscazzare

sa zorronada mia in su limbiccu!

Si lu fatto ti nd'has a buffonare

buffende su decott'a ticc'a ticcu,

e forsis has a narrer cun recreu :

A sa salude de maridu meu!

 

Muzere

Bae chi deo non ispendo gai,

anzis su punzu meu es mes'avaru;

caffè a cua no nde fatto mai,

già so padron'e lu fagher in giaru ;

ma no nde buffo ch'est unu guai,

prima de tottu ca su caff'est caru,

segundariamente, dés cumprender,

c'happo pagos dinaris de ispender.

 

Maridu

Cunsumad'has dinaris e sienda,

tottu cant'in decottu ti 1'has bidu.

A una buttegher'has dad'in prenda

finamente s'aneddu 'e s'affidu!

Caffè a bustu, caffè a merenda,

manten'a cuppas, poveru maridu!

Frundidu c'has dae domo milli trastos

dados in pignu pro pagare gastos!

 

                                                                                      

per contattarci: corofem@hotmail.com