GALUSE'

 

1.        

Gentile signorina,

chi cal'abe a sa ros'a mie olas,

umil'e peregrina

bundo tra sos fiores e nucciolas;

so frisca e cristallina,

si t'abbascias a mie ti consolas.

A su cantaru meu

fritti sas laras, ca nd'has ingranzeu.

 

2.

Deo, bundanziosa,

so fentomada tra funtanas raras,

cun tottus amurosa,

so dispensera de sas abbas giaras:

s'est chi nde ses bramosa

a mie fritt'un'istante sas laras.

Si gustas abbas mias

ds isclamare: Beneitta sias!.

 

3.

Chi frisca e pura sia

l'ischit Cabu'e Susu e Campidanu.

A sa friscura mia

benint sididos dae su pianu;

cun d'un'istill'ebbia

s'essere maladu torro sanu.

Da' lontan'in s'istiu

tottus bramant su meu murmuriu.

 

4.

Eo so Galus,

logu delissiosu de incantu.

Firm'inoghe su pe',

o passizzeri, cust'est logu santu:

deo cunfid'in te;

zelt'has accurrer a mi dare vantu,

cun bellas cumpagnias,

a t'infriscare de sas abbas mias.

 

5.

Umil'in custa rocca

mai de murmurar'happo zessadu;

 bentu fritt'e fiocca

hana sas venas mias astragadu,

mai per sa brocca

hat su nettaru sou ismentigadu;

pedidu m'hat continu

sos bundantes umores ch'happo in sinu.

 

6.

Ancoras oe in die

no mi mancant dulzuras e bisittas.

Tottus current a mie,

e si consolant de sas abbas frittas,

e deo, rie rie,

cuntento broccas mannas e brocchittas.

Dae custas frittas venas

sempere partint sas broccas pienas.

 

7.

A cust'abba, sididas,

sunt bennidas donosas virginellas,

 a mie sun bennidas

bajanas de Sardigna sas pius bellas:

tottas si sunt frittidas

a mi fagher onore. Pastorellas,

signorinas e damas,

de me cuntentas, nd'hant contadu famas.

 

8.

Dae logos istranzos

bennidu b'hat dottissimas persones,

e in festas e pranzos

cottu b'hana crabittos e anzones,

e mandigos liccanzos:

puddas, porcheddos, pisch'e maccarrones.

In custas abbas puras

hant ismaltidu zelebres cotturas.

 

9.

Tottus hant divertidu

ismentighende dogni cuntierra:

preideros happ'idu

cottos cantend'a sonu 'e chiterra;

 anzis nd'happ'assistidu

beatament'istrampados in terra,

in brazzos d'una vera,

solenne, reverenda imbreaghera.

 

10.

Inoghe sa tristura

morit e torrat s'animu serenu.

Sa sogra cun sa nura

in custas abbas lassant su velenu,

anzis si dana cura

de lassare s'immina in su terrenu,

c'hant fattu s'angallitta

unidas a pedirem'abba fritta.

 

11.

Tottus sunt uguales,

inoghe nemos vantat sos blasones.

Baculos pastorales

s'aunint a ispadas e bastones.

Tottus parent fedales,

sas bezzas con sas giovanes persones,

bezzones e battias

torrant piseddos a sas abbas mias.

 

12.

Odios e affectos

in me hant imprentadu sos c'hant bidu,

ma deo sos secretos

happo gelosamente custoidu,

ca non sunt indiscretos

sos umores ch'in vid'happo sumidu.

E narrer ch'isco cosas

chi parent finas meravigliosas!

 

13.

Frisca, bundant'e pura,

cantas festas happ'idu e cantu giogu;

basos dados a fura,

toccos de man'e miradas de fogu.

Happ'intesu sa giura

de s'amant'a s'amada; in custu logu,

tra cantos e festinos,

happo bidu... una fila de puntinos.

 

14.

De'happo ido bettas

benner de nott'a custu logu santu,

crabolas in palettas

de fagher meravigl'e ispantu,

e atteras suggettas

incarazzadas de nieddu mantu:

cuddas pis santiccas

s'hant bagnadu sas laras tantu siccas.

 

15.

De' happ'intesu cosas

chi a las narrer non parent costadas.

Zetras armoniosas,

fruscios de contrabband'e muiladas;

umbras misteriosas

fattu ball'hant segundu sas sonadas,

e ateras cosas puru,

chi non happIdu pro esser iscuru.

 

16.

Bajanas samunende

intendo criticare ogni persone,

sas tales critichende

su mal'anzenu 1'ischint a cantone:

una s'est lamentende

 chi l'hant male pesadu su sabone,

un'ater'a dovere

criticat sas camijas de su mere.

 

17.

Mi vantant sos duttores

vera ricetta de sa gent'istitica;

a sos meos umores

benid'a si purgare sa Politica.

Musseres e segnores,

a s'ora de su votu tantu critica,

inoghe, saturnale,

dant su famosu pranzu elettorale.

 

18.

Tando sos maccarrones

morint in buccas dottas e famidas,

misciados a sermones

e a bellas promissas non cumpridas.

Cantas discussiones

galu vivas in me sunt imprimidas!

Ma de tantas paraulas

nd'happ'incunzadu unu saccu'e faulas.

 

19.

A sas friscuras mias

benint a fagher paghe sos contrarios.

Diversas rettilias,

preides, polizzottos, cummissarios

e nobiles ispias,

inoghe si dnt festas e isvarios.

Inoghe su delittu

fatt'hat cun sa giustissia s'ojttu.

 

20.

Inoghe s'allegria

mai si ponet abidos de dolu.

Intes'happ'a Pipia

cantend'a zirfa cun su russignolu;

sa suav'armonia

de cussas boghes m'hat dadu consolu.

A sos cantigos graves

rispust'happo cun murmuros suaves.

 

21.

Un'epoca beniat

unu giovanu pallid'e ramasu.

Inoghe invocaiat

sas noe virginellas de Parnasu:

afflittu pianghiat,

e mentres chi m'imprimiat unu basu,

misciaiat amaras

lagrimas a sas mias abbas giaras.

 

22.

Fit affligidu tantu

chi li naia su misteriosu:

flebile unu cantu

in laras 1'intendia dolorosu.

Com'in su campusantu

creo chi dormat s'ultimu riposu.

Non pis b'est bennidu,

n una cara novella nd'happ'ischidu.

 

23.

Ischier nde che ria:

galu l'happo costant'in s'intellettu,

prit'una poesia

m'hat iscrittu gentil'e cun affettu;

servidemi de ghia,

s'a cas'est galu vivu su suggettu

nadel' o signorinas,

chi torret a' custas abbas cristallinas.

 

24.

Si mai l'hazis bidu,

breve nde fatto sa biografia;

est pallidu, bestidu a pannos tristos de malinconia,

mesu test'ispilidu;

in laras si 1'annottat s'angustia,

est debile de fisicu,

camminat a istentu, paret tisicu.

 

25.

Bizzarr'est e selvaticu,

paret un'isciareu estid'a pannos;

n bellu n simpaticu,

cumparit bezz'e hat vintichimb'annos ;

in sa fronte viaticu

giughet iscritt'a caratteres mannos:

distint'est sa persone

sorr'a s'inseparabile bastone.

 

26.

S'a casu 1'incontrades

in s'umanu consorziu vivente,

de coro li pregades

chi mi fettat bisitta prontamente,

anzis li consizades

chi torret prestu e allegramente;

nadeli chi fulana

est torrad'amuros'a sa funtana.

 

27.

O bellas zittadinas,

lassade sas gazzosas e limones;

cussas sunt meighinas

de chie giughet frazigos pulmones.

Si custas cristallinas

abbas bidides, vivides ruzones,

sanas comente dindos;

e chi s'impicchent a sos tamarindos.

 

28.

E tue, imbreagone

chi giughes in sa ula sa siccagna,

e cottu su pulmone,

cun sa test'attontada de migragna;

su bin'in su pistone

lass'e ben'a inogh'a sa muntagna

e curad'in sas veras

abbas friscas istud'imbreagheras.

 

29.

Tue, o Lia cara,

de custu logu ds essere sa prama.

Che a' cust'abba giara

cunservadi onorad'a babb'e mama,

fentomada pro rara

in virtudes, belles' onor' e fama.

Chelzo chi s'abba mia

potat narrer: so pura che a Lia.

 

30.

Como benis a mie

senz'algunu penseri: ses minore,

gentil'e rie rie,

bestida 'e pures'e de candore;

goi pur'unu die

benzas in cumpagnia de s'amore.

Su die, o Lia cara,

m'has agattare pis frisca e giara.

 

31.

De coro su disizu

happo chi siast mia fittiana:

rosa ses, cun su lizu

ben'a inoghe donosa e galana,

s'intemeradu chizu

cunserva sorrident'a sa funtana,

c'hat happidu sa fama

de haer cumbidad'a babb'e mama.

 

32.

De sa pur'abba mia

ben'e leande cun devossione:

 la giughes a cresia,

li faghes dare benedissione;

pro chi servat, o Lia,

cando chi su preide s'unione

suggellat, de su coro

chi t'amat, a su tou, o rosa d'oro.

 

                                                                                      

per contattarci: corofem@hotmail.com