I

PROPOSTA AMOROSA

 

1.

O gentile donzella,

lei, de custu coro mia stella,

bella, brillante, graziosa e pura,

in notte tenebrosa, oscura, oscura,

pro me paret chi siat apparida,

de amorosu risu florida,

a mi narrer: «Amadu meu, ispera».

Si pro me in s'aèra

est beru chi esistit tantu raggiu,

non mi trunchet in coro su coraggiu

ma issu alimentet sa fiamma.

O signorina senta,

si fostè nd'est cuntenta,

pro fagher sa domanda benit mamma:

seria est sa proposta,

sia gentile de una risposta.

 

2.

Non so de razza ignobile,

so cavalieri nobile,

giovanu galu so e s'ideale

meu est fostè, l'adoro.

Su lumen'e su coro

l'intrego, si mi narat ch'est reale

su sognu ch'in sa mente

m'est persighinde continuamente.

 

3.

Duncas già m'hat cumpresu,

chi unu fogu in sinu l'happo azzesu

e chi so pro fostè ispasimante.

Si no est digna de m'essere amante

mi rispundat luego a s'indirizzu:

signor cavalier Fromigadizzu.

 

II.

 

RISPOSTA AMOROSA

 

4.

Signor cavaliere,

eccomi a cumprire su dovere

de giovane educada.

Altamente onorada

resto de sa proposta,

ma sa mia risposta,

o caro signor, do:

francamente est chi no.

 

5.

Lei lo sa che sono pastorella

tottu canta sa mia parentella,

dae me consultada in custu casu,

si nd'hat formadu tres palmos de nasu ;

dae su prùs mannu a su piùs minore,

non nde tenzat dolore,

cun tres palmos de ucca,

hana gridadu : «Zucca!».

 

6.

E fattu m'hant cumprender ca so fea,

appartenente a sa classe plebea

senza fioccos e piumas de moda

e lei è spasimante pro sa doda.

Cavaliere carissimo, capita;

a mie deghet unu cun berritta.

Abbrazzare una rugh'est grave pesu;

si fatto cussu, a su chi happo intesu

mi giamant : Signora crucifissa.

Menzus sa vida de sa pastorissa.

 

7.

Sa nobilìa non m'andat a grabbu

e a la nar rer giara, mamma e babbu

pro custu sunt che tiaulu e dimoniu:

trattendeli de custu matrimoniu

est su matessi a lis dare sa china.

Fostè si chirched'una signorina

bella e graziosa in sa presenzia

e li resessat de cunvenienzia:

si pro casu b'hat neu in cussu coju

no est delittu su serrare un'oju.

 

8.

Fromigadizzo caro,

col massimo rispetto mi dichiaro

de fostè devotissima s'amiga:

pastorella Maria Cruccuriga.

 

                                                                                      

per contattarci: corofem@hotmail.com