SU MINESTRONE

 

1.

Già chi tantu t'aggradat sa minestra

ti dò de minestrone unu piattu.

Est male coghinadu e a sa lestra,

 

2.

a fogu'e linna irde l'happo fattu,

ma si nd'assazzas una trudda solu

t'agattas prontamente soddisfattu.

 

3.

B'hat fae, b'hat lentizza cun basolu,

 patata, caule cun concas de raba,

 cottas in su matessi labiolu.

 

4.

Su cundimentu est de ozzu'e craba,

 ca non tenia né lardu né sumene:

chie non tenet mele ponet saba.

 

5.

B'has agattare fittas de cugumene,

cosa ligera pro sa gente sana

chi non faghe né pesu né ballumene.

 

6.

B'happo postu unu pagu de denziana,

ranziga cantu est ranziga sa china,

però a mandigare attit sa gana.

 

7.

B'happo ettadu tre fozas de pimpina,

e si b'hat calchi cosa mesu crua

est chi b'hat de armuttu raighina.

 

8.

Postu l'happo cicuta e pagu lua:

mancari nelzan chi est velenosa,

pappa, c'ada esser sa salude tua.

 

9.

Si comente no haia menzus cosa,

pro poder pienare sa padedda

l’appo postu unu mazzu 'e pigulosa.

 

10.

Aligarza, fenuju e lattaredda

e pro fagher su brodu piùs licanzu

una tazza de latte 'e feruledda.

 

11.

Un'iscia mi pariat su brodu lanzu:

l'happo minadu un'ou de istria,

attentu non cumbìdes calchi istranzu.

 

12.

Podes cumprender, custa porcheria

est indigesta pro sos delicados

ca b'hat erbas de ogni genia.

 

13.

Cuddos chi non bi sunu abituados

e non s'abbizant de su minestrone,

si nde mandigant, morint velenados.

 

14.

Duncas ti prego: dona attenzione

de non nde dare a su primu famidu,

mira ch'est zerta s'indigestione!

 

15.

Si a tie happo fattu su cumbidu

est ca ses de istogomo provadu

e non t'offendet nessunu cundidu.

 

16.

Mandiga duncas senza coidadu,

a tie zertu non ti faghet male

mancu sa lua chi 1'happo misciadu.

 

17.

Giughet pibere meda e pagu sale

e i sos trunzos chi bi sunu

in mesu nde tiran de ucca su murrale.

 

18.

Tue però chi a tottu ses avvesu

dés esclamare: «Ite zibu lichittu

est custu minestrone tonaresu!».

 

19.

Anzis si ses in ora de appitittu

ti dét esser grata sa ludura

e timo chi cummittas su delittu

 

de ti ender sa prima genitura.

 

                                                                                      

per contattarci: corofem@hotmail.com